IDEA 17 noyabr tarixində Bakının Zığ qəsəbəsində  və 1 dekabr tarixində Azərbaycanın ikinci ən böyük şəhəri olan Gəncədə “Daha yaşıl bir Azərbaycan üçün bizə kömək et!” şüarı altında ağacəkmə aksiyası həyata keçirdi.

Bakıda 5000-dən çox ağac IDEA hərfləri formasında əkilib. Gəncədə isə 1000-ə yaxın IDEA könüllülərinin iştirak etdiyi aksiya əsası 1979-cu ildə Ulu öndər Heydər Əliyevin təşəbüssü ilə qoyulan və hal-hazırda onun adını daşıyan Parkda baş tutmuşdur. Gənclərin aktiv iştirakı nəticəsində Parkın ərazisində 10000-dən çox Eldar şamı və xan çinarı əkilmişdir.

Gələcəkdə baş verə biləcək təbii və antropogen təsirlərin qarşısını almaq, ərazinin biomüxtəlifliyini qorumaq və ona töhfə vermək məqsədilə təşkil olunan aksiyada könüllülər aktiv iştirak nümayiş etdirməklə digər gənclərə örnək olmağa, onlara ətraf mühitin qorunmasının vacibliyini bu yolla çatdırmağa səy göstərmişlər.

Qeyd edək ki, IDEA İctimai Birliyi mütəmadi olaraq bu cür ekoloji aksiyalar təşkil etməklə insanlar arasında ekoloji təbliğat işini gücləndirmək, gənclərin ətraf mühitin qorunması, atmosferin zərərli qazlardan təmizlənməsi işində iştirakını təmin etmək, “Gələcək nəsillər üçün sağlam dünya” ideyasını yaymaq kimi məqsədləri hədəfləyir.