IDEA İctimai Birliyinin Sahibsiz Heyvanlar üçün Xilasetmə və Sığınacaq Mərkəzinin təqdimatı keçirilmişdir.

8 may 2015-ci il tarixində heyvanları müdafiə təşkilatları və heyvansevər vətəndaşların iştirakı ilə IDEA İctimai Birliyinin Bakı şəhərinin Qaradağ rayonunda inşa etdirdiyi Sahibsiz Heyvanlar üçün Xilasetmə və Sığınacaq Mərkəzinin təqdimatı keçirilmişdir.

Mərkəzin rəsmi təməlqoyma mərasimi Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın iştirakı ilə 9 oktyabr 2014-cü il tarixində baş tutmuşdur. Sığınacağın tikintisində aparıcı dövlətlərin təcrübəsindən istifadə edilmiş və layihə-tikinti işlərinə tanınmış xarici mütəxəssislər cəlb olunmuşdur. Sözügedən Mərkəzin bu ilin sonuna kimi istismara verilməsi nəzərdə tutulur.

Müasir texniki avadanlıqlarla təchiz edilmiş və beynəlxalq standartlara cavab verən sığınacaq kompleksində sahibsiz heyvanlara peyvənd, sterilizə və zəruri hallarda əməliyyat xidmətlərinin göstərilməsi, həmçinin onların daimi və müvəqqəti məskunlaşması üçün hər cür şəraitin yaradılması nəzərdə tutulmuşdur.

Sığınacaqda heyvanlar üçün mobil təcili tibbi yardım xidmətinin fəaliyyət göstərməsi və sahibsiz heyvanların humanist şəkildə Mərkəzə gətirilməsinə məsul xüsusi qrupun yaradılması planlaşdırılır. 

Təqdimat zamanı qeyd edilmişdir ki, Mərkəzdə heyvanların müayinə və müalicəsi üçün yüksək səviyyəli avadanlıqlarla təchiz olunmuş müasir klinika, heyvan mehmanxanası, müxtəlif təlimlər və tədbirlərin keçirilməsi üçün təlim mərkəzi, himayəyə götürülməyə hazır heyvanların nümayiş olunduğu kompleks və heyvanların daimi və müvəqqəti məskunlaşması üçün böyük sığınacaqlar yerləşəcəkdir. Burada yerləşən itlərin gəzinti və oynama parkları ictimaiyyətə açıq olacaq və istənilən şəxs öz ev heyvanını bu parka gəzintiyə gətirə biləcək.

Təqdimat zamanı IDEA İctimai Birliyi inşa olunan sığınacaqların sahibsiz heyvanların müdafiəsi ilə məşğul olan yerli təşkilatlarla birlikdə istifadə etmək niyyətini elan etmiş və görüşdə iştirak edən təşkilatları birgə əməkdaşlığa dəvət etmişdir.

IDEA-nın Sahibsiz heyvanlar üçün Xilasetmə və Sığınacaq Mərkəzi heyvanlara qayğı göstərmək istəyən könüllülər və heyvan sevərlər üçün daim açıq olacaqdır.        

IDEA İctimai Birliyinin bu təşəbbüsü təqdimatda iştirak edən heyvansevərlər tərəfindən yüksək qiymətləndirilmişdir.