IDEA kampaniyası Litvada Beynəlxalq Ekoloji Forumda təmsil olunub

IDEA (Ətraf mühitin mühafizəsi naminə beynəlxalq dialoq) kampaniyası beynəlxalq fəaliyyətin növbəti addımı kimi Litvada keçirilən beynəlxalq ekoloji forumda təmsil olunur.

Litvanın Druskininkai şəhərində keçirilən ənənəvi forum “Tullantıların idarə edilməsi” mövzusunda keçirilib.

Forumda Avropada tullantıların idarə edilməsi sahəsində hökumət və QHT-lərin təcrübəsi, habelə bu proseslərdə gənclərin rolu haqda fikir mübadiləsi aparılıb.

IDEA-nın nümayəndəsi Kampaniyanın iştirakçılara təqdimatını çatdıraraq forumun mövzu istiqamətləri üzrə aparılan müzakirələrə öz töhfəsini verib.

IDEA kampaniyası ilə yanaşı ölkəmizdən tədbirdə iştirak edən “Təmiz Şəhər” ASC-nin nümayəndəsi tədbir iştirakçılarını Bakıda tullantıların idarə edilməsinə dair aparılan uğurlu dövlət siyasəti və icra edilən layihələr haqqında məlumatlandırıb.

Bundan başqa, Kampaniyanın Litva nümayəndəliyinin təşkilatçılığı ilə Litva və Azərbaycanı təmsil edən ekoloji təşkilatların nümayəndələri ilə gələcək iş birliyinin perspektivləri və əsas istiqamətləri də müzakirə edilib.

Qeyd edək ki, Azərbaycan ilk dəfə olaraq bu il, IDEA kampaniyası və Azərbaycanın Litvadakı səfirliyinin dəstəyi ilə qeyd olunan beynəlxalq forumda iştirak edir.