IDEA quş sığınacaqları Bakının müxtəlif ərazilərində quraşdırılmışdır

IDEA kampaniyası 2013-cü ilin may ayında Dünya Köçəri Quşlar günü münasibətilə həyata keçirilən beynəlxalq aksiyaya qoşulmuşdur. Aksiya çərçivəsində Bakı şəhərinin müxtəlif ərazilərində quş sığınacaqları qurulmuşdur.

IDEA quş sığınacaqlarının qurulması müvafiq olaraq İçərişəhərdə, Azərbaycan Diplomatik Akademiyasının şəhərciyində, Bakı bulvarı, İzmir parkı və Elmlər Akademiyasının ətrafındakı yaşıllıq ərazilərdə həyata keçirilmişdir. Ümumilikdə 100-dən çox quş sığınacaqlarının quraşdırılması baş tutmuşdur.

Quş sığınacaqları İçərişəhərdə İrəli İctimai Birliyinin fəalları, ADA şəhərciyində isə ADA tələbələrinin iştirakı ilə quraşdırılmışdır.

Şəhərlərin ekoloji balansının bərpa olunmasında əhəmiyyətli rol oynayan quş sığınacaqlarının quraşdırılması hər il may ayında qeyd olunan Beynəlxalq Köçəri Quşlar Gününə həsr edilmişdir.

Qeyd edək ki, IDEA quş sığınacaqları daha öncə Bişkek və Moskva şəhərlərində quraşdırılmışdır.

Bildiyimiz kimi,  IDEA kampaniyası köçəri quşların mühafizəsində ictimaiyyətin rolunu artırmaq və insanların təbiətə xüsusi qayğıkeş münasibətini formalaşdırmaq məqsədi ilə 2012-ci ilin may ayında Beynəlxalq Köçəri Quşlar Günü münasibətilə “Quşlar üçün sığınacaq dizaynı” adı altında müsabiqə elan etmişdir. Müsabiqəyə 100-dən çox eskiz təqdim edilmişdir.