“Uşaqlar üçün laboratoriya” layihəsi çərçivəsində növbəti təlim keçirilmişdir

20 avqust tarixində IDEA İctimai Birliyi və "Sevimli bala" təşkilatının birgə layihəsi olan "Uşaqlar üçün ekoloji laboratoriya" çərçivəsində IDEA İctimai Birliyinin Azərbaycan Respublikası Prezidenti yanında Dövlət İdarəçilik Akademiyasında yerləşən Resurs Mərkəzində 6-11 yaşlarında olan uşaqlar üçün tullantılar və onların təkrar emalı mövzusuna həsr olunmuş növbəti təlim keçirilmişdir.

Təlim zamanı uşaqlara tullantılar və onların təkrar emalı prosesi, bu prosesin Planetimiz, xüsusilə də canlı aləm üçün nə qədər mühüm əhəmiyyət kəsb etməsi haqqında məlumat çatdırılmışdır. "Kiçik ekoloqlar", həmçinin tullantıların çeşidlənməsi, azaldılması və təkrar istifadəsi yolları ilə də tanış olmuşlar.

Bundan əlavə, gənc təbiətsevərlər əyləncəli bilik yarışmalarında, bir sıra sınaqların keçirilməsində iştirak etmiş, istifadə olunmuş müxtəlif materiallardan ətraf mühitə yararlı yeni əşyalar hazırlamağı öyrənmişlər. Daha sonra, "Eko laboratoriya"nın iştirakçılarına nümayiş olunan IDEA-nın plastik butulkalardan təkrar emal nəticəsində hazırlanmış bel çantası uşaqların böyük marağına səbəb olmuşdur.

IDEA İctimai Birliyi və "Sevimli Bala" təşkilatının birgə əməkdaşlığı ilə təşkil olunan Avqust laboratoriyası uşaqlara maraqlı və əyləncəli gün bəxş etməklə yanaşı, həm də ətraf mühitin mühafizəsində vacib amillərdən hesab olunan tullantıların azaldılması və təkrar emalı proseslərini kiçik yaşlardan öyrənmələri baxımından mühüm töhfə vermişdir.

Qeyd edək ki, çoxsaylı istəkləri nəzərə alaraq, eynimövzulu laboratoriya təlimimiz 30 avqust tarixində IDEA-nın Gəncə şəhərində yerləşən Resurs Mərkəzində də keçiriləcəkdir.

IDEA İctimai Birliyinin Resurs Mərkəzlərində təşkil olunan "Uşaqlar üçün ekoloji laboratoriya"da iştirak etmək istəyənlərdən IDEA İctimai Birliyi ilə (497-63-16) əlaqə saxlamaları xahiş olunur.