18 iyul tarixində IDEA İctimai Birliyi və “Sevimli bala” təşkilatının birgə həyata keçirdiyi “Uşaqlar üçün laboratoriya” layihəsi çərçivəsində növbəti təlim keçiriləcəkdir.

“Uşaqlar üçün laboratoriya”nın İyul təlimi su və onun xüsusiyyətləri, qorunması, vacibliyi mövzusuna həsr olunacaqdır.

Belə ki, təlim zamanı uşaqlara su və suyun xüsusiyyətləri, onun Yer kürəsi üçün vacibliyi, insan orqanizmi və ümumiyyətlə canlı aləm üçün nə qədər mühüm əhəmiyyət kəsb etməsi haqqında məlumatlar çatdırılacaq, həmçinin “kiçik ekoloqlara” suyun qorunması və ona qənaət edilməsi, onun təmiz saxlanması yolları izah ediləcəkdir.

Bundan əlavə, gənc təbiətsevərlər bir sıra eksperimentlərin keçirilməsində iştirak edəcək, şüşə su qabının içərisində meduza, fincanın içərisində göyqurşağı, həmçinin lava lampası hazırlamağı öyrənəcəklər. “Eko laboratoriya”nın iştirakçıları təlimçilərin köməyilə öz su aləmlərini yaradacaq və sabun köpükləri düzəldərək açıq havada əylənəcəklər.

İyul laboratoriyası uşaqlara ətraf mühitin əsas elementlərindən olan su və onun xüsusiyyətləri ilə bağlı biliklər qazandırmaqla yanaşı, həm də  onlarda kiçik yaşlarından suyun vacibliyi və ona qənaətlə bağlı təsəvvür yaratmaq baxımından faydalı olacaqdır.

IDEA İctimai Birliyinin Azərbaycan Respublikası Prezidenti yanında Dövlət İdarəçilik Akademiyasında yerləşən Resurs Mərkəzində təşkil olunacaq “Uşaqlar üçün ekoloji laboratoriya”da iştirak etmək istəyənlərdən IDEA İctimai Birliyi ilə (497-63-16) əlaqə saxlamaları xahiş olunur.