17 iyun tarixində Rusiyanın Xantı-Mansiysk şəhərində “Xilas etmək və qorumaq” adlı XIX Beynəlxalq ekoloji televiziya festivalı başa çatmışdır. IDEA İctimai Birliyinin təşəbbüsü ilə rejissor İqor Bışnyovun çəkdiyi “Quşların cənnəti - Ağgöl Milli Parkı” adlı sənədli film festival çərçivəsində keçirilən “ilin televiziya layihəsi” mükafatına layiq görülmüşdür.

“Quşların cənnəti - Ağgöl Milli Parkı” IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən “Azərbaycanın 9 möcüzəsi” layihəsi çərçivəsində lentə alınmış sayca ikinci filmdir. 2014-cü ildə sözügedən təşəbbüs çərçivəsində Şirvan Milli Parkına həsr olunmuş eyniadlı sənədli film çəkilərək, ictimaiyyətə təqdim olunmuşdur. IDEA İctimai Birliyi “Azərbaycanın 9 möcüzəsi” layihəsi çərçivəsində ölkəmizin 9 milli parkının gözəlliklərini tərənnüm edən ümumilikdə 9 film çəkməyi planlaşdırır.

Qeyd olunmalıdır ki, “Quşların cənnəti - Ağgöl Milli Parkı” sənədli filminin ilk nümayişi 24 aprel tarixində Bakı şəhərində, Nizami Kino Evində keçirilmişdir.