14 fevral tarixində IDEA İctimai Birliyi və “Sevimli bala” təşkilatının birgə layihəsi olan “Uşaqlar üçün ekoloji laboratoriya” çərçivəsində IDEA İctimai Birliyinin Azərbaycan Respublikası Prezidenti yanında Dövlət İdarəçilik Akademiyasında yerləşən Resurs Mərkəzində 5-10 yaşlarında olan uşaqlar üçün növbəti təlim keçirilmişdir.

Laboratoriya uşaqların heyvanlarla tanışlığına və onlarda heyvanlara qarşı sevgi hissinin aşılanmasına həsr olunmuşdur. Laboratoriya zamanı uşaqlar ev heyvanlarına qayğı göstərməyin, onları bəsləməyin və yetişdirməyin sirlərinə yiyələnmiş, heyvanlar barədə maraqlı faktlar və məlumatlar əldə etmişlər.

Bununla yanaşı, laboratoriya zamanı uşaqlar ev heyvanlar ilə əyani şəkildə tanış olmuş, onlarla maraqlı vaxt keçirmişlər.

Layihənin ənənəsinə uyğun olaraq, təlimlərin gedişində “kiçik ekoloqlar” üçün, həmçinin müxtəlif bilik yarışmaları və maraqlı oyunlar təşkil olunmuşdur. Bununla yanaşı, uşaqlar heyvanları təsvir edən müxtəlif incəsənət nümunələri, o cümlədən rəsmlər və kağız fiqurlar yaratmışlar.

Təlim uşaqlara əyləncəli gün bəxş etməklə yanaşı, onların təbiəti daha yaxşı qavramalarına töhfə vermişdir.

Növbəti təlimlərin tarixləri və mövzuları barədə elanlar mütəmadi olaraq, mətbuatda dərc olunacaqdır.